កុមារកំពុងលេងបាល់នៅជំរុំជនភៀសសឹក ស្ថិតនៅវត្តពោធិ៥០០០ដើម ឃុំគូលេនត្បូង ស្រុកគូលេន ខេត្តព្រះវិហារ
ភ្នំពេញ — ប្រទេសកម្ពុជា និង ប្រទេសថៃ បានព្រមព្រៀងគ្នាលើលក្ខខណ្ឌសម្រាប់អនុវត្តបទឈប់បាញ់ បន្ទាប់ពីមានកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ (GBC) ដែលបានធ្វើឡើងនៅរដ្ឋធានីកូឡា ឡាំពួរ ប្រទេសម៉ាឡេស៊ី នៅថ្ងៃទី៧ ខែសីហា នេះ។
លោក ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិនៃព្រះរាជាណាចក្រកម្ពុជា និងលោក ណាត់ថាផន ណាក់ផានិត រដ្ឋមន្ត្រីរងការពារជាតិនៃរដ្ឋមន្ត្រីការពារជាតិស្តីទីនៃព្រះរាជាណាចក្រថៃ បានចុះហត្ថលេខាលើឯកសារកំណត់ហេតុនៃកិច្ចប្រជុំ ក្រោមការសម្របសម្រួល និងរៀបចំធ្វើម្ចាស់ផ្ទះរបស់ប្រទេសម៉ាឡេស៊ី។
ការព្រមព្រៀងគ្នានេះជាជំហានសំខាន់មួយទៀតសំដៅបញ្ចៀសការផ្ទុះអាវុធសាជាថ្មីរវាងកងទ័ពនៃប្រទេសទាំងពីរ ក្រោយពីបានធ្វើការវាយប្រហារគ្នានៅតាមតំបន់មានជម្លោះព្រំដែន អស់រយៈពេលប្រាំថ្ងៃ ពីថ្ងៃទី២៤ ដល់ថ្ងៃទី២៨ ខែកក្កដា។
កំណត់ហេតុដែលមាន ១៣ ចំណុចធំៗ ផ្តើមជាមួយការយល់ព្រមរបស់ភាគីទាំងពីរលើ “បទឈប់បាញ់ ពាក់ព័ន្ធនឹងប្រភេទអាវុធទាំងអស់ រួមទាំងការវាយប្រហារលើជនស៊ីវិល និងវត្ថុស៊ីវិល និងគោលដៅយោធារបស់ភាគីម្ខាងៗ ក្នុងគ្រប់ករណី និងគ្រប់តំបន់។ ភាគីទាំងពីរត្រូវតែចៀសវាងការបាញ់ប្រហារដែលគ្មានការបង្កហេតុទៅកាន់ទីតាំងឬកងទ័ពរបស់ភាគីម្ខាងទៀត។ កិច្ចព្រមព្រៀងនេះមិនត្រូវបានបំពានក្នុងកាលៈទេសៈណាមួយឡើយ។”
ការដាក់ពង្រាយកងទ័ពបច្ចុប្បន្ននឹងរក្សានៅដដែល ដោយគ្មានការផ្លាស់ទីបន្ថែមទៀត ដូចដែលបានកំណត់ចាប់ពីពេលដែលបទឈប់បាញ់ចូលជាធរមាន ថ្ងៃទី ២៨ ខែកក្កដា ឆ្នាំ ២០២៥ ហើយក៏នឹងមិនត្រូវមានការផ្លាស់ទីកងទ័ព រួមទាំងការល្បាតឆ្ពោះទៅកាន់ទីតាំងរបស់ភាគីម្ខាង ឡើយ។
សេចក្តីប្រកាសព័ត៌មានរួមបានបញ្ជាក់ដូច្នេះថា៖ “ភាគីទាំងពីរយល់ព្រមមិនបង្កើនកងកម្លាំងនៅតាមបណ្តោយព្រំដែនកម្ពុជា-ថៃទាំងមូលឡើយ។ រាល់ការពង្រឹងកម្លាំងអាចនឹងបង្កើនភាពតានតឹង និងប៉ះពាល់អវិជ្ជមានដល់កិច្ចខិតខំប្រឹងប្រែងរយៈពេលវែងដើម្បីដោះស្រាយស្ថានការណ៍”។
កងទ័ពនឹងរក្សាការទាក់ទងគ្នាជាប្រចាំនៅតាមតំបន់នៅតាមបណ្តោយព្រំដែននៃភាគីទាំងពីរ និងខិតខំដោះស្រាយរាល់បញ្ហាទាំងអស់ដោយសន្តិវិធី និងចៀសវាងការប៉ះទង្គិច។ លើសពីនេះ ភាគីទាំងពីរក៏បានយល់ព្រមចៀសវាងពីការផ្សព្វផ្សាយព័ត៌មានមិនពិត ឬព័ត៌មានក្លែងក្លាយ ផងដែរ ដើម្បីបន្ថយភាពតានតឹង កាត់បន្ថយអារម្មណ៍អវិជ្ជមានរបស់សាធារណជន និងលើកកម្ពស់បរិយាកាសដែលអំណោយផលដល់កិច្ចសន្ទនាដោយសន្តិវិធី។
ការព្រមព្រៀងគ្នានេះសម្រេចបានតាមរយៈការសម្របសម្រួលរបស់លោក អានវ៉ា អ៊ីប្រាហ៊ីម នាយករដ្ឋមន្ត្រីនៃប្រទេសម៉ាឡេស៊ី និងបច្ចុប្បន្នជាប្រធាននៃសមាគមអាស៊ាន។
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានសម្តែងការអបអរសាទរចំពោះការព្រមព្រៀងគ្នាដែលសម្រេចបាននេះ ហើយក៏បានអំពាវនាវឱ្យភាគីថៃឱ្យដោះលែងយោធិនកម្ពុជាទាំង ១៨រូប ដែលស្ថិតនៅក្រោមការឃុំគ្រងរបស់កងទ័ពថៃ ឱ្យបានឆាប់រហ័សផងដែរ។
