រូបភាពដោយ វណ្ណ ច័ន្ទថាដា
ដោយ ផល្លី ស្រីនិច និង ថាត ម៉ូលីកា និស្សិតឆ្នាំទី២ នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍
ភ្នំពេញ — ពលរដ្ឋកម្ពុជាដែលត្រូវបានស្ទង់មតិ បានសម្តែងការគាំទ្រយ៉ាងច្រើនលើសលប់ ចំពោះចំណាត់ការរបស់រាជរដ្ឋាភិបាលនៅក្នុងវិវាទព្រំដែនជាមួយប្រទេសថៃ ក្នុងនោះ ៩៩,៨ភាគរយ គាំទ្រការដាក់សំណើទៅតុលាការយុត្តិធម៌អន្តរជាតិ (ICJ) ឱ្យជួយដោះស្រាយជម្លោះនៅលើចំណុចបួនតាមព្រំដែននៃប្រទេសទាំងពីរ។
វិទ្យាស្ថានចក្ខុវិស័យអាស៊ី (Asian Vision Institute) បានថ្លែងដូច្នេះកាលពីថ្ងៃទី១៨ ខែមិថុនា នៅក្នុងសេចក្តីប្រកាសព័ត៌មានមួយអំពីលទ្ធផលនៃការ ស្ទង់មតិតាមប្រព័ន្ធអនឡាញ និងសម្ភាសផ្ទាល់ជាមួយប្រជាជនចំនួន ១៥៨៨នាក់ ដែលក្នុងនោះមានអ្នកឆ្លើយសំណួរជាយុវជន វ័យកណ្ដាល និងវ័យចំណាស់ មកពីមជ្ឈដ្ឋានផ្សេងៗ គ្នារួមទាំងពលករក្នុងនិង ក្រៅស្រុក។
សេចក្តីប្រកាសព័ត៌មាននិយាយថា ៩៣.៦ ភាគរយ នៃប្រជាជនកម្ពុជាពេញចិត្ត ចំពោះសកម្មភាពរបស់រាជរដ្ឋាភិបាលក្នុងការដោះស្រាយវិវាទនេះ។ អ្នកឆ្លើយស្ទើរតែទាំងអស់ គឺ ៩៩.៨% គាំទ្រការណ៍ដែលរាជរដ្ឋាភិបាលបានលើកយកជម្លោះព្រំដែននៅចំណុចប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅដោះស្រាយនៅតុលាការយុត្តិធម៌អន្តរជាតិ។ មានត្រឹមតែ ១,១ ភាគរយ នៃអ្នកឆ្លើយប៉ុណ្ណោះ ដែលមានជំនឿលើការប្រើប្រាស់យន្តការចរចាទ្វេភាគីដែលមានស្រាប់។
អ្នកឆ្លើយចំនួន ៨៨,៧ ភាគរយ យល់ស្របជាមួយការសម្រេចចិត្តបិទព្រំដែនរបស់កម្ពុជា ដែលជាការឆ្លើយតបទៅនឹងការបិទជាឯកតោភាគីរបស់ប្រទេសថៃ ហើយ ៨៨,៦ ភាគរយ គាំទ្រការប្រើប្រាស់ទំនិញក្នុងស្រុកជំនួសវិញ។
ការចេញផ្សាយលទ្ធផលស្ទង់មតិនេះ ជួនគ្នានឹងព្រឹត្តិការណ៍ “ដំណើរថ្មើរជើង Solidarity March” ក្នុងរាជធានីភ្នំពេញ នៅថ្ងៃម្សិលមិញ ដែលមានមនុស្សប្រហែល ១៥ម៉ឺននាក់ ចូលរួមពីសាលមហាស្រពកោះពេជ្រ ដល់វិមានឯករាជ្យ ដើម្បីបង្ហាញស្មារតីសាមគ្គីជាធ្លុងមួយក្នុងការគាំទ្រដល់រាជរដ្ឋាភិបាល និងកងកម្លាំងប្រដាប់អាវុធកម្ពុជា ក្នុងចំណាត់ការការពារបូរណភាពទឹកដី អធិបតេយ្យជាតិ។
ព្រឹត្តិការណ៍នេះត្រូវបានដឹកនាំរៀបចំធ្វើដោយ ឯកឧត្តម ឧបនាយករដ្ឋមន្ដ្រី ហ៊ុន ម៉ានី ប្រធានសហភាពសហព័ន្ធយុវជនកម្ពុជា។ ក្នុងឱកាសនេះ លោកឯកឧត្តមមានប្រសាសន៍លើកឡើងថា “ការជួបជុំនៅពេលនេះ ក៏អាចជាសារមួយផងដែរ ហើយសារនោះគឺបញ្ជាក់ថា ពេលដែលប្រទេសកម្ពុជា មានការគំរាមកំហែង ប្រជាជនខ្មែរនឹងមិននៅស្ងៀមនោះទេ ប្រសិនបើមានការប្រមាថណាមួយមកលើកិត្តិយស និងដែនបូរណភាពទឹកដី របស់ប្រជាជនកម្ពុជា”។
ឯកឧត្តមបានសង្កត់ធ្ងន់ទៀតថា៖ “យើងនឹងងើបឈរ ដោយស្មារតីរួមគ្នាគាំទ្ររាជរដ្ឋាភិបាលកម្ពុជា និងកងកម្លាំងជាតិរបស់យើងក្នុងការ ការពារបូរណភាពទឹកដី ការពារប្រយោជន៍ជាតិ និងការពារភាពសុខសាន្តរបស់ជាតិ។ ទោះជាយ៉ាងក្តី យើងជ្រើសរើសស្របតាមការណែនាំរបស់សម្តេចតេជោ និងសម្តេចមហាបវរធិបតី គឺដោះស្រាយរាល់បញ្ហារបស់កម្ពុជាដោយសន្តិវិធី និងផ្នែកលើមូលដ្ឋានច្បាប់”។
