ប្រភពរូបភាព៖ ទំព័រហ្វេសប៊ុក Hun Manet, Prime Minister of Cambodia
ដោយ ហ៊ាង សុគន្ធមល្លិកា និង អ៊ឹង ហ្យេកប៊ួយ និស្សិតឆ្នាំទី២ នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍
ភ្នំពេញ — កម្ពុជា នៅថ្ងៃចន្ទនេះ ដាក់លិខិតផ្លូវការមួយទៅតុលាការយុត្តិធម៌អន្តរជាតិ (ICJ) ដោយសុំឱ្យជួយរកដំណោះស្រាយពាក់ព័ន្ធបញ្ហាព្រំដែនចំនួនបួនតំបន់ ដែលមានវិវាទជាមួយប្រទេសថៃ រហូតមានការផ្ទុះអាវុធកាលពីចុងខែកន្លងទៅ។
តំបន់ទាំងបួននោះ គឺ ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី នៅតាមបន្ទាត់ព្រំដែនក្នុងទឹកដីកម្ពុជា ដែលកំពុងមានភាពប្រទាញប្រទង់ជាមួយប្រទេសថៃ។
សម្តេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា មានប្រសាសន៍ថា កម្ពុជាលើកយកបញ្ហានេះទៅដោះស្រាយនៅតុលាការយុត្តិធម៌អន្តរជាតិ ដោយ “កម្ពុជាត្រូវការតែយុត្តិធម៌ ភាពត្រឹមត្រូវ និងច្បាស់លាស់មួយ ក្នុងការកំណត់ខ្សែព្រំដែនជាមួយប្រទេសជិតខាង ដើម្បីកុំឱ្យកូនចៅជំនាន់ក្រោយនៅបន្តមានបញ្ហាមិនចេះចប់ជាមួយគ្នា”។
ទំនាក់ទំនងរវាងប្រទេសទាំងពីរមានភាពតានតឹងក្នុងពេលជាងពីរសប្តាហ៍កន្លងមកនេះ ក្រោយពីទាហាកម្ពុជាម្នាក់បានស្លាប់ នៅពេលកងទ័ពថៃធ្វើការបាញ់មកលើចំណុចឈរជើងរបស់កងទ័ពកម្ពុជា នៅតំបន់មុំបី នៅថ្ងៃទី២៨ ខែឧសភា។
សម្តេច ហ៊ុន ម៉ាណែត បានសរសេរនៅលើទំព័រហ្វេសប៊ុកផ្លូវការនៅថ្ងៃអាទិត្យម្សិលមិញថា ស្ថានឯកអគ្គរាជទូតកម្ពុជាប្រចាំប្រទេសហូឡង់ នឹងប្រគល់លិខិតដោយផ្ទាល់ដៃទៅតុលាការយុត្តិធម៌អន្តរជាតិ នៅទីក្រុងឡាអេ នៅថ្ងៃទី១៦ ខែមិថុនា នេះ។
គួរបញ្ជាក់ដែរថា ក្រោយពីខកខានអស់ពេលជាច្រើនឆ្នាំ គណ:កម្មការចម្រុះព្រំដែនរវាងកម្ពុជានិងថៃ បានបញ្ចប់កិច្ចប្រជុំរយ:ពេលពីរថ្ងៃម្សិលមិញ គឺថ្ងៃទី១៥ ខែមិថុនា។
នៅក្នុងសេចក្តីប្រកាសព័ត៌មានកាលពីថ្ងៃអាទិត្យ រដ្ឋលេខាធិការដ្ឋានកិច្ចការព្រំដែនកម្ពុជា បានបញ្ជាក់ថា តំបន់ទាំងបួនដែលកំពុងមានជម្លោះលែងជាប្រធានបទ ឬកម្មវត្ថុនៃការពិភាក្សា និងដោះស្រាយនៅក្នុងក្របខណ្ឌគណៈកម្មការចម្រុះព្រំដែនកម្ពុជាថៃទៀតហើយ។ សេចក្តីប្រកាសបានបន្ថែមទៀតថា ភាគីកម្ពុជាបានបដិសេធយ៉ាងដាច់ខាតមិនទទួលស្គាល់ផែនទីដែលភាគីថៃបានគូសជាឯកតោភាគី ហើយយកមកប្រើប្រាស់ជាសំអាង ដែលជាប្រភពចម្បងនាំមកនូវជម្លោះព្រំដែនរ៉ាំរ៉ៃ នាពេលកន្លងមក ក៏ដូចជាពេលបច្ចុប្បន្ន និងទៅអនាគត។
ទន្ទឹមគ្នានេះ សម្តេច ហ៊ុន ម៉ាណែត ក៏បានណែនាំឱ្យក្រសួង និងស្ថាប័នពាក់ព័ន្ធ ផ្តល់ការសម្របសម្រួលគ្រប់បែបយ៉ាងដល់ពលករខ្មែរដែលកំពុងធ្វើការនៅក្នុងប្រទេសថៃ ក្នុងករណីដែលគេចង់វិលត្រឡប់មកធ្វើការនៅក្នុងប្រទេសកម្ពុជាវិញ ដែលកំពុងតែខ្វះកម្លាំងពលកម្មស្រាប់។
