រូបតំណាង។ ប្រភពរូបភាព៖ World Bank Photo Collection
ដោយ សុង ឡូរី និង អ៊ឹម ស្រីពេជ្រ និស្សិតឆ្នាំទី២ នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍
ភ្នំពេញ – របាយការណ៍ជំរឿនកសិកម្មចុងក្រោយបានបង្ហាញអំពីការធ្លាក់ចុះនៃចំនួនគ្រួសារប្រកបមុខរបរកសិកម្មនៅកម្ពុជា ព្រមទាំងទិន្នន័យសំខាន់ៗផ្សេងទៀតដែលមន្ត្រីជាន់ខ្ពស់ចាត់ទុកថាមានមូលដ្ឋាន សម្រាប់ទាក់ទាញការវិនិយោគ និងជំរុញវិស័យនេះឱ្យមានកំណើនប្រកបដោយចីរភាពថែមទៀត។
គិតត្រឹមឆ្នាំ ២០២៣ ចំនួនគ្រួសារប្រកបមុខរបរកសិកម្មនៅកម្ពុជា បានធ្លាក់ចុះមកនៅត្រឹមអត្រា ៥៤,៥% ពីអត្រាប្រមាណជិត ៨២% នៅឆ្នាំ២០១៣ – នេះបើយោងតាមការចុះផ្សាយរបស់ក្រសួងផែនការ នៅលើទំព័រហ្វេសប៊ុកផ្លូវការរបស់ក្រសួង កាលពីថ្ងៃទី១៩ ខែឧសភា ឆ្នាំ២០២៥។
ការចុះផ្សាយនោះបានដកស្រង់ប្រសាសន៍របស់ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ នៅក្នុងពិធីប្រកាសផ្សព្វផ្សាយជាផ្លូវការនូវរបាយការណ៍ថ្នាក់ជាតិស្តីពីលទ្ធផលចុងក្រោយ នៃជំរឿនកសិកម្មកម្ពុជា ឆ្នាំ២០២៣។
របាយការណ៍បានឱ្យដឹងថា ក្នុងចំណាមគ្រួសារសរុប ជាង៣,៤លានគ្រួសារ នៅកម្ពុជា មានគ្រួសារកាន់កាប់កសិកម្មចំនួន ១,៨៥លានគ្រួសារ ដែលត្រូវបានធ្វើជំរឿន។ លទ្ធផលបានបង្ហាញ ចំនួនគ្រួសារកាន់កាប់កសិកម្ម បានថយចុះប្រមាណ ២៨ម៉ឺនគ្រួសា ឬ ១៣% បើប្រៀបធៀបទៅនឹងលទ្ធផលនៃជំរឿននៅឆ្នាំ២០១៣។ ចំណែកឯគ្រួសារប្រកបមុខរបរកសិកម្មវិញ ចំនួនមានការប្រែប្រួលធ្លាក់មកនោះត្រឹម ៥៤,៥% នៅឆ្នាំ២០២៣ ធៀបទៅនឹងប្រមាណ ៨២% នៅឆ្នាំ២០១៣។
ការចុះផ្សាយរបស់ក្រសួង មិនបានបញ្ជាក់មូលហេតុនៅពីក្រោយការធ្លាក់ចុះនេះទេ។ ប៉ុន្តែការផ្សាយនោះបានបន្ថែមថា ផលិតភាពដាំដំណាំស្រូវនៅទូទាំងប្រទេស គិតជាមធ្យមស្មើនឹង ៣,៤ តោន ក្នុង១ហិកតា។
ឯកឧត្តម សុខ ចិន្តាសោភា ឧបនាយករដ្ឋមន្រ្តី មានប្រសាសន៍ក្នុងពិធីផ្សព្វផ្សាយរបាយការណ៍នោះថា លទ្ធផលនៃជំរឿននេះ បានបង្ហាញអំពីការផ្លាស់ប្តូររបស់ស្ថានភាពកសិកម្មនៅកម្ពុជា មក ”ដល់របត់មួយគួរឱ្យកត់សម្គាល់តាមរយៈការប្រើប្រាស់បច្ចេកវិទ្យា ដើម្បីលើកកម្ពស់ផលិតភាពកសិកម្ម និងជីវភាពរស់នៅរបស់កសិករ។”
ឯកឧត្តមបានបន្ថែមទៀតថា លទ្ធផលនេះជាទិន្នន័យមិនអាចខ្វះបាន សម្រាប់ “ជាប្រយោជន៍ដល់ការធ្វើធុរកិច្ច និងទាក់ទាញការវិនិយោគ សំដៅជំរុញឱ្យមានកំណើនវិស័យកសិកម្មប្រកបដោយចីរភាព និងបរិយាបន្ន។”
