ដោយ នឹម ចាន់ស្រីពេជ្រ និស្សិតឆ្នាំទី២ នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍
ភ្នំពេញ – សម្ដេចនាយករដ្ឋមន្រ្តី ហ៊ុន ម៉ាណែត បានណែនាំឱ្យក្រសួងសុខាភិបាលត្រៀមវ៉ាក់សាំង គ្រូពេទ្យ និងមណ្ឌលព្យាបាល ដើម្បីអន្តរាគមន៍បន្ទាន់ក្នុងករណីមានការផ្ទុះឡើងវិញ នៃមេរោគកូវីដ–១៩ ក្នុងទ្រង់ទ្រាយធំ។
សេចក្ដីប្រកាសព័ត៌មានស្ដីពីលទ្ធផលកិច្ចប្រជុំពេញអង្គគណៈរដ្ឋមន្ត្រី នាថ្ងៃទី២៣ ខែឧសភា ឆ្នាំ២០២៥ បានដកស្រង់ប្រសាសន៍របស់សម្តេចនាយករដ្ឋមន្ត្រីដែលបានធ្វើការកត់សម្គាល់ថា បច្ចុប្បន្ន ជំងឺកូវីដ-១៩ បំប្លែងខ្លួនថ្មីបានកើតឡើងវិញជាច្រើននៅប្រទេសជិតខាង ខណៈដែលកម្ពុជាក៏ចាប់ផ្តើមមានករណីឆ្លងឡើងវិញដែរ។
ប្រភពរូបភាព៖ ទំព័រហ្វេសប៊ុក Samdech Thipadei Hun Manet, Prime Minister of Cambodia
សម្តេចបវរធិបតី ហ៊ុន ម៉ាណែត បានណែនាំឱ្យក្រសួងសុខាភិបាលឱ្យត្រៀមកន្លែងសម្រាប់រក្សាទុកវ៉ាក់សាំង១លានដូស ដែលយន្តការ «កិច្ចសម្របសម្រួលជំនួយវ៉ាក់សាំងបង្ការជំងឺកូវីដ ជាសាកល» ហៅកាត់ (COVAX) ត្រូវផ្តល់ឱ្យកម្ពុជាបន្ថែម ដើម្បីទប់ស្កាត់ការរីករាលដាលឡើងវិញនៃវីរុសកូវីដ-១៩ បំប្លែងថ្មី ជាពិសេសប្រភេទ JN.1 ដែលកំពុងមានការឆ្លងច្រើននៅប្រទេសជិតខាងកម្ពុជា និងនៅទូទាំងពិភពលោក។
ក្រសួងសុខាភិបាល បានប្រកាសឱ្យដឹងថាបានរកឃើញករណីឆ្លងជំងឺកូវី-១៩ ថ្មី ក្នុងសហគមន៍ចំនួន៦ករណី នៅថ្ងៃទី២៣ ខែឧសភា។ បើគិតត្រឹមពីដើមខែ មកដល់ថ្ងៃទី២៣ ឧសភានេះ កម្ពុជាមានការឆ្លងកូវីដ-១៩ សរុប ចំនួន ៥២ករណី។
អង្គការសុខភាពពិភពលោកបានឱ្យដឹងថា វីរុសអូមេក្រុងបំលែងថ្មីប្រភេទ JN.1 មានការរាលដាលយ៉ាងឆាប់រហ័ស។ វីរុសប្រភេទ JN.1 នេះត្រូវបានរកឃើញដំបូងក្នុងខែសីហា ឆ្នាំ២០២៣។ គិតមកត្រឹមពាក់កណ្ដាលខែមីនា ឆ្នាំ២០២៥ ជាង ១៥%នៃករណីឆ្លងកូវីដ-១៩ សរុបទូទាំងពិភពលោក គឺជាពពួកអូមេក្រុងបំប្លែងថ្មីប្រភេទ JN.1។ អ្នកជំងឺឆ្លងវីរុសប្រភេទនេះមានរោគសញ្ញាមិនខុសគ្នាពីប្រភេទកូវីដ-១៩ ទេ។
ក្រសួងសុខាភិបាលក៏បានក្រើនរំឭកប្រជាពលរដ្ឋឱ្យបង្កើនការយកចិត្តទុកដាក់ និងប្រុងប្រយ័ត្នខ្ពស់ ដោយអនុវត្តវិធានការ ៣ការពារ និង ៣កុំ រួមជាមួយនឹងការចាក់វ៉ាក់សាំងការពារកូវីដ-១៩ នៅតាមមណ្ឌលសុខភាព ដើម្បីកាត់បន្ថយឱ្យបានជាអតិបរមានូវភាពធ្ងន់ធ្ងរនៃជំងឺនេះ ទោះបីជាប្រភេទ JN.1 នេះមិនបណ្តាលឱ្យមានជំងឺធ្ងន់ធ្ងរជាងប្រភេទអូមេក្រុងពីមុនក៏ដោយ។
