ប្រភពរូបភាព៖ ទំព័រហ្វេសប៊ុកក្រសួងការពារជាតិ
ដោយ ហែម ចាន់ធីតា និង ម៉ៅ សម្បត្តិ
ភ្នំពេញ – កងទ័ពកម្ពុជាម្នាក់បានស្លាប់នៅក្នុងការប៉ះទង្គិចដោយប្រដាប់អាវុធរវាងកងទ័ពកម្ពុជា និងកងទ័ពថៃ នៅត្រង់ចំណុចព្រំដែនតំបន់មុំបី ក្នុងខេត្តព្រះវិហារ។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវឱ្យប្រជាពលរដ្ឋរក្សាភាពស្ងប់ស្ងៀម ខណៈដែលភាគីកម្ពុជានិងថៃនឹងជួបពិភាក្សាគ្នាក្នុងគោលបំណងសម្រាលភាពតានតឹងជុំវិញជម្លោះព្រំដែននេះ។
ក្រសួងការពារជាតិបានឱ្យដឹងដូច្នេះនៅក្នុងសេចក្តីប្រកាសព័ត៌មានមួយចុះថ្ងៃទី២៨ ខែឧសភា ឆ្នាំ២០២៥ ដោយនិយាយថាការប៉ះទង្គិចនេះ បានកើតឡើងនៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ។ កងទ័ពថៃបានធ្វើការបាញ់មុនមកលើលេណដ្ឋាន ដែលជាទីតាំងឈរជើងរបស់កងទ័ពកម្ពុជាជាយូរលង់ណាស់មកហើយ នៅត្រង់ចំណុចព្រំដែនកម្ពុជា-ថៃដែលហៅថាតំបន់មុំបី បណ្តាលឱ្យបាត់បង់ជីវិតកងទ័ពកម្ពុជាម្នាក់។
ទាហានដែលបាត់បង់ជីវិតនោះ មានឈ្មោះ សួន រ៉ោន អាយុ ៤៧ឆ្នាំ និងឋានន្តរស័ក្តិព្រឹន្ទបាលឯក – នេះបើយោងតាមលិខិតរំលែកមរណទុក្ខ ចុះថ្ងៃទី២៨ ខែឧសភា ដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានផ្ញើជូនក្រុមគ្រួសារសព។
តាមរយៈសំណេរដោយឡែកនៅលើទំព័រហ្វេសប៊ុករបស់សម្តេចផ្ទាល់ សម្តេចនាយករដ្ឋមន្ត្រីក៏បានឲ្យដឹងដែរថា កម្ពុជាបានចល័តទ័ព និងអាវុធធុនធ្ងន់មួយចំនួនទៅកាន់ព្រំដែន បន្ទាប់ពីមានការប៉ះទង្គិចប្រដាប់អាវុធនោះ។
សម្តេច ហ៊ុន ម៉ាណែត សរសេរថា៖ “ខ្ញុំធ្លាប់បានលើកក្នុងវេទិកាសាធារណៈកន្លងរួចមកហើយ កម្ពុជាមិនមានបំណងឈ្លានពានប្រទេសណាមួយនោះទេ ហើយយើងចង់ឱ្យការដោះស្រាយបញ្ហាព្រំដែន ប្រព្រឹត្តទៅដោយផ្អែកលើមូលដ្ឋានបច្ចេកទេសនិងច្បាប់អន្តរជាតិ។ ប៉ុន្តែកម្ពុជាក៏រក្សាសិទ្ធិនៅក្នុងប្រើប្រាស់គ្រប់មធ្យោបាយដើម្បីការពារបូរណភាពទឹកដីរបស់ខ្លួន រួមទាំងការប្រើប្រាស់កងកម្លាំងប្រដាប់អាវុធ ក្នុងករណីមានការព្យាយាមឈ្លានពានរំលោភលើបូរណភាពទឹកដីកម្ពុជា តាមរយៈការប្រើប្រាស់កម្លាំងប្រដាប់អាវុធ។”
សម្តេចបន្ថែមទៀតថា សម្តេចសង្ឃឹមថាជំនួបរវាងមេបញ្ជាការកងទ័ពជើងគោកកម្ពុជា និងមេបញ្ជាការកងទ័ពជើងគោកថៃនៅល្ងាចនេះ (២៩ ឧសភា) នឹងទទួលបានលទ្ធផលវិជ្ជមាន ក្នុងការរក្សាស្ថានភាពស្ងប់ស្ងាត់ និងការប្រាស្រ័យទាក់ទងគ្នាល្អរវាងកងទ័ពជួរមុខរបស់យើងទាំងពីរដូចដែលបានធ្វើកន្លងមក។
សម្តេចនាយករដ្ឋមន្ត្រីក៏បានអំពាវនាវផងដែរ “ឲ្យបងប្អូនប្រជាពលរដ្ឋខ្មែរយើង ទប់ស្កាត់កុំឲ្យបញ្ហានេះទៅរីកធំរហូតក្លាយជាជម្លោះជាតិសាសន៍ និងសូមផ្ដល់ការទុកចិត្តចំពោះរាជរដ្ឋាភិបាល ក៏ដូចជាកងទ័ពរបស់យើងក្នុងការស្វែងរកដំណោះស្រាយលើបញ្ហានេះដោយការទទួលខុសត្រូវខ្ពស់។”
